"მხარს არ ვუჭერ მაჟორიტარული სისტემის გაუქმებას, მზად ვარ, ამ საკითხის სანაცვლოდ დავტოვო არა მხოლოდ უმრავლესობა, არამედ მანდატი" - ირაკლი შიოლაშვილი

ეს პერსონა

მხარს არ ვუჭერ მაჟორიტარული სისტემის გაუქმებას, მზად ვარ, ამ საკითხის სანაცვლოდ დავტოვო არა მხოლოდ უმრავლესობა, არამედ საკუთარი მანდატი, – ამის შესახებ საპარლამენტო უმრავლესობის წევრმა, სიღნაღი-დედოფლისწყაროს მაჟორიტარმა დეპუტატმა ირაკლი შიოლაშვილმა განაცხადა.

როგორც ირაკლი შიოლაშვილმა აღნიშნა, საყოველთაო-სახალხო განხილვების დროს მთავარი კითხვა იყო, რატომ ართმევდნენ მოსახლეობას პირდაპირი არჩევანის საშუალებას, რატომ არ უნდა ჰყოლოდათ თავიანთი მაჟორიტარი.

„მხარს არ ვუჭერ მაჟორიტარული სისტემის გაუქმებას, მათ შორის არის მეორე სახის კითხვა – მაჟორიტარული სისტემის გაუქმება და მხოლოდ პროპორციულ სისტემაზე გადასვლა რამდენად იქნება გარანტი ქვეყნის სტაბილურობის? ბევრ ქვეყანაში პოლიტიკური კრიზისია, რაც არასტაბილურობაში გადადის. ვიმედოვნებ, ჩვენს ქვეყანას შეექმნას არასტაბილურობის პრობლემა. მხარს არ დავუჭერ ამ გადაწყვეტილებას. პრინციპული ხაზია და მზად ვარ, ამ საკითხის სანაცვლოდ დავტოვო არა მხოლოდ უმრავლესობა, არამედ საკუთარი მანდატი. თუ ჩვენს მოსაზრებებს არ გაითვალისწინებენ და იქნება გარკვეული ზეწოლა, მზად ვართ, გადაწყვეტილება მანდატის დატოვებაზე მივიღოთ“, – განაცხადა ირაკლი შიოლაშვილმა.

პროპორციულ საარჩევნო სისტემაზე გადასვლასთან დაკავშირებით ოპოზიციის მიერ მომზადებული საკონსტიტუციო ცვლილებების პროექტი დღეს პარლამენტში  კენჭისყრაზე ჩავარდა.

ამასთან, სხდომაზე მცხეთის რაიონის მაჟორიტარმა დეპუტატმა, დიმიტრი ხუნდაძემ მოითხოვა, პროპორციულ საარჩევნო სისტემაზე გადასვლასთან დაკავშირებით საპარლამენტო უმრავლესობის მიერ მომზადებული პროექტის განხილვამდე უმრავლესობის სხდომა გამართულიყო, რადგან მისივე თქმით, კითხვები ჰქონდა. ამასთან, ხუნდაძემ საპარლამენტო უმრავლესობის დატოვებაც არ გამორიცხა.

საკითხზე უმრავლესობაში კონსულტაციები გაიმართა, რომელიც უკვე დასრულდა.

ამასთან, ოპოზიციის მიერ მომზადებული კანონპროექტით გათვალისწინებული იყო არჩევნების ჩატარება სამპროცენტიანი ბარიერის პირობებში, ასევე დაშვებული იყო საარჩევნო ბლოკებად გაერთიანება.

უმრავლესობის მიერ მომზადებული ცვლილებები კი, 2020 საპარლამენტო არჩევნების პროპორციული სისტემით ჩატარებას ითვალისწინებს. კერძოდ, პროექტის თანახმად, პოლიტიკური პარტიის მიერ მიღებული მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური პარტიის მიერ მიღებული ხმების ჯამზე გაიყოფა. ცვლილებების მიხედვით, არჩევნები ნულოვანი, ე.წ. ბუნებრივი ბარიერის პირობებში ჩატარდება.

წყარო: 1tv.ge
0
0
0
0
0
კომენტარები
ეს პერსონა
Top